mardi 22 mai 2018

Et un poème en kreol de Wilson BEGUE (Moris).



Kan mo ti zanfan dan Rodrig
mo ti kontan mars-marse lor laplaz
sirtou dan tanto
zis avan soley plonze
avan mama apel mwa
pou get mo refle dan lasiet
kan mo ti zanfan
lor laplaz Mourouk
ti ena boukou touris
zot fer mwa gran-gran sourir
dir mwa "bonjour jeune homme"
dir mwa mo mignon… kute… schön…
fer mwa mari fier
sirtou kan touris-la enn ti mam’zel
mo get so lizie ble so seve zonn
so tete roz
gagn gidigidi anba sintir…
sizan plitar
dan Bordo
lepok koko ti pe kabose liniversite
mo ti kontan mars-marse otour laplas
sirtou dan gramatin
zis avan soley leve
kan ankor fer nwar
pou pa tro fer tas dan dekor
dan Bordo
otour la place des Quinconces
mem boner gramatin
ti ena boukou zokris
zot get mwa
zot soupire lev lizie
pa dir nanyen
nek lev lizie
me dan zot lizie ble
souvan mo finn tann
"ninport"… "zako"…
gagn gidi-gidi kot lamour-prop
bon
aster kapav mwa ki paranoyak
mwa ki pe exazere
kapav !
Antouka
zame pa finn tann "bonjour"
bayo
vo mie zwenn ar Blan lor laplaz Mourouk
– toutou touzour fezer dan so lakour –
me pa grav
mo p'ena rankinn
p'ena koler
mo zis anvi riye
riy zonn
dakor
me riye kan mem
parski tan ki ou riye
ou an vi
e tan ki ena lavi…
anfin


ou konn laswit


























Wilson BEGUE.







Aucun commentaire:

Enregistrer un commentaire